जनकपुरधाम १७ असोज । जनकपुरधामको साहित्यिक आकाशमा मैथिली कविताका शब्दहरू फेरि गुञ्जिएका छन्। मैथिली साहित्य समाज, जनकपुरधामको आयोजनामा सम्पन्न १५२औँ कवि गोष्ठीमा कविता केवल भाव र कल्पनाको अभिव्यक्ति बनेन, यसले सहरको वर्तमान, समाजका समस्या र भविष्यको सपनालाई समेत स्वर दिएको छ।
कवि काशी काजत झा ‘रसिक’को संयोजकत्वमा आयोजित गोष्ठीको अध्यक्षता संविधानसभा सदस्य शीतल झाले गर्नुभएको थियो। जनता समाजवादी पार्टी नेपालका केन्द्रीय सदस्य तथा सामाजिक अभियन्ता संजय कुमार चौधरी प्रमुख अतिथिका रूपमा सहभागी हुनुभएको थियो।

कार्यक्रममा प्रमुख अतिथि चौधरीले मन्तव्यसँगै कविता वाचन गर्दै जनकपुरधामको वर्तमान अवस्था र भविष्यको सम्भावनालाई कवितात्मक भावमा प्रस्तुत गर्नुभयो। उहाँको कवितामा जनकपुरधामको विकास र सरसफाइदेखि बेरोजगारी, अव्यवस्थित ट्राफिक, पर्यटन प्रवद्र्धन, कला–संस्कृतिको संरक्षण तथा किसानका अवसरसम्मका विषयले स्थान पाएका थिए।
कवितामार्फत उहाँले समृद्ध र व्यवस्थित जनकपुरधामको कल्पना प्रस्तुत गर्दै ‘नव जनकपुरधाम’को परिकल्पनालाई सिर्जनात्मक ढंगले अघि सार्नुभयो। विकासको गति र सांस्कृतिक पहिचानबीचको सम्बन्धलाई कविताको भावभूमिमा उभ्याउँदै उहाँले जनकपुरधामलाई नयाँ सम्भावनाको सहरका रूपमा हेर्नुपर्ने धारणा व्यक्त गर्नुभयो।
गोष्ठीमा दुई दर्जनभन्दा बढी कविले आफ्ना सिर्जना प्रस्तुत गरे। विभिन्न भाव, विषय र शैलीमा प्रस्तुत कवितामा प्रेम, प्रकृति, समाज, संस्कृति, राजनीति, समसामयिक जीवन र जनजीवनका विविध पक्ष प्रतिविम्बित भएका थिए।

मैथिली भाषाको मिठाससँगै कविताले समाजका पीडा, प्रश्न र सम्भावनालाई समेत उजागर गरेको थियो। कतिपय कवितामा बदलिँदो सामाजिक परिवेशको चित्रण थियो भने कतिपयमा मिथिला संस्कृति र पहिचानप्रतिको अनुराग। कविताका पंक्तिपंक्तिमा आफ्नै माटो, आफ्नै समाज र आफ्नै समयको आवाज सुनिन्थ्यो।
नियमित रूपमा आयोजना हुँदै आएको कवि गोष्ठीले मैथिली साहित्यको सिर्जनात्मक निरन्तरतालाई जोगाइराख्न महत्वपूर्ण भूमिका खेल्दै आएको आयोजकको भनाइ छ। साहित्यिक सिर्जनामार्फत नयाँ पुस्तालाई मैथिली भाषासँग जोड्ने, पुराना पुस्ताका साहित्यिक परम्परालाई पुस्तान्तरण गर्ने तथा समसामयिक विषयलाई मैथिली साहित्यमा अभिव्यक्त गर्ने कार्यमा यस्ता कार्यक्रम प्रभावकारी बन्दै आएका छन्।
जनकपुरधाम आफैँ मिथिला सभ्यता, संस्कृति र साहित्यको ऐतिहासिक केन्द्र हो। यहाँ आयोजना हुने नियमित साहित्यिक गतिविधिले त्यस सांस्कृतिक विरासतलाई जीवन्त राख्नुका साथै समकालीन समाजसँग जोड्ने काम गरिरहेका छन्।
१५२औँ कवि गोष्ठी पनि त्यही साहित्यिक यात्राको अर्को महत्वपूर्ण कडी बनेको छ—जहाँ कविता केवल वाचन भएन, मैथिली भाषा, मिथिला संस्कृति र बदलिँदो जनकपुरधामको सपना एउटै साहित्यिक मञ्चमा बोल्यो।