जनकपुरधाम, १८ साउन । पछिल्लो २४ घण्टामा मधेश प्रदेशका विभिन्न स्थानमा भारी वर्षा मापन गरिएको छ। जल तथा मौसम विज्ञान विभागका अनुसार मधेशका एक केन्द्रमा "धेरै भारी" वर्षा (१०० मिलिमिटरभन्दा बढी) भएको छ भने पाँचवटा केन्द्रमा "भारी" वर्षा मापन गरिएको छ।
सबैभन्दा बढी वर्षा सिराहा जिल्लाको सिराहा हाइड्रो केन्द्रमा १०१.६ मिलिमिटर मापन गरिएको छ। मौसम विज्ञानको मापदण्डअनुसार २४ घण्टामा १०० मिलिमिटरभन्दा बढी पानी परेमा त्यसलाई "धेरै भारी वर्षा" मानिन्छ।
त्यसैगरी सिराहाकै लहान केन्द्रमा ७७.२ मिलिमिटर तथा गोलबजार केन्द्रमा ५२.८ मिलिमिटर वर्षा भएको छ। सप्तरीको मरमझिया केन्द्रमा ९३ मिलिमिटर, रुपनी बजार केन्द्रमा ८२ मिलिमिटर तथा कल्याणपुरमा ४९.४ मिलिमिटर वर्षा मापन गरिएको छ।
धनुषा जिल्लाको हर्दिनाथमा ४७ मिलिमिटर, तुलसी केन्द्रमा ४७.८ मिलिमिटर, महोत्तरीको गौशालामा ५८ मिलिमिटर र सर्लाहीको परवानीपुरमा ४८.४ मिलिमिटर वर्षा भएको विभागले जनाएको छ।
यसैबीच, पछिल्लो २४ घण्टामा प्रदेश १ अन्तर्गत उदयपुरको गाईघाटमा सर्वाधिक १३२ मिलिमिटर वर्षा मापन गरिएको छ। झापाको अनारमनी बिर्तामा १२५ मिलिमिटर र दमकमा ११२.८ मिलिमिटर वर्षा भएको छ।
मौसम पूर्वानुमान महाशाखाका अनुसार शुक्रबार राति पनि मधेशमा व्यापक वर्षा भएको थियो। आज दिउँसो र राति पनि मधेश प्रदेशका केही स्थानमा भारी वर्षाको सम्भावना रहेको महाशाखाले जानकारी दिएको छ।
